ابحث عني

ثورة الغضب حان وقت الرحيل

2011-01-29T11:45:00.003+03:00

في مفاجاه لم تسبق لها مثيل قال الشعب كلمته و نزل الشارع و قدم تضحيات ضخمه من اجل الكرامه

اللهم ارحم قتلانا واشف جرحانا و ازل مبارك و من تبعه

تدوينه حداد خالد سعيد

2010-06-25T00:17:00.002+03:00

تدوينه حداد لخالد سعيد

بس يا سيدي وراحت معيطه

2010-05-02T00:51:00.004+03:00

ده جروب علي الفيس بوك مسخره كده كل فكرته ان اي حد يكتب اي حاجه اخرها بس ياسيدي وراحت معيطه الغريب بقي ان عدد الناس زاد فيه قوي

انقر هنا بس بالراحه

انا اصلا لقيت هاشتاج علي التويتر عنه قوليت مين ده وبعيدن لما قريته عند لماضه عرفته شكرا لماضه علي الجروب اللذيذ
:)

لماضه

تحياتي

هي الدنيا برد ليه كده

2010-03-23T18:25:00.002+03:00

قولت اجرب اخدي اجازتي قبل الصيف نزلت اجازه بس مكنتش عارف انها هتبقي برد كده
اخيرا هقضي اجازه طويله شويه في مصر ياتري ايه اتغير لحد دلوقتي الي شايفه بس الدنيا بقيت زحمة اكتر
:)
تحياتي

عام هجري سعيد - كل عام وانتم بخير

2009-12-20T10:56:00.001+03:00

كل عام و انتم بخير عيد سعيد في مصر

2009-09-15T10:25:00.004+03:00

واخيرا بعد عناء طويل وانتهاء اصعب فترات العمل هعيد في مصر :)

كل عام و انتم بخير عيد سعيد وان شاء الله انا موجود في مصر لحد اخر الشهر

ده معناها ان هاكل كحك العيد هييييييييييه

:)))
تحياتي

اجمل ماقيل في تعريف المغترب :)

2009-05-17T14:21:00.002+03:00

تعريف المغترب:

هوكائن محسود مادياً,

مجهول عائلياً,

مقهور إعلامياً,

مرهق جسدياً,

مدمرنفسياً,

مشتت فكرياً,

حائر عاطفياً,

يتصل يومياً,

ونهايته مختل عقلياً

*من الايميل بتصرف
:)

مصر كما نراها من الخارج

2009-04-26T10:39:00.003+03:00

مصر كما نراها هتكم شويه عن مصر الناس الي في الغربه شايفينها ازاي بحكم كام سنه غربه وكام سفريه وشويه صحاب في اغلب دول وقارات العالم مستقرين فيها
جزء من الناس وده يقارب نص صحابي او اكتر شايفين ان مصر مكان مش ينفع لاكتر من اجازه وان الحاله في مصر و المعيشه لاتصلح للاستخدام الادمي

جزء تاني بيشوف الغربه انها اضطرار اكتر منه اختيار و ان الحياة في مصر هي الاساس

ملاحظتي بالنسبه للاماكن الي الناس فيها اغلب الي عايشين في دول الخليج شايفين ان مصر هي اساس حياتهم في استثناءات زي الي عايشين في قطر او شويه من الي في الكويت و الامارات بس ده الاحساس الغالب
الي في دول اوربا بالنسبه لهم الغربه اختيار بس لمدة معينه غالبا عاملين حسابهم للاستقرار في مصر بعد الخمسين

وزيهم برضه الي في امريكا

اما استراليا و كندا مشوفتش ناس لسه عاوزين يرجعوا مصر :) والي بيرجع بيكون مضطر علشان الاولاد اما الباقي فراحوا علشان يموتوا هناك

كان اهم سؤال بيشغل بالي هل وجود حياة نظيفه شويه وهاديه سبب اساسي اننا نكره الرجوع للبلد ونحاول نعيش فيها تاني لسه مستغرب من الي يقول اه مصر بزحمتها ومشاكلها فيها روح مهما كان مش موجوده في اي حته تاني مصر الحياة فيها ليها طعم مختلف وجودك وسط عائلتك بيفرق كتير وجودك وسط مكان عيشت فيه وانت صغير ذكرياتك نفسها موجوده في مصر مستحيل يبقي الحياة في مكان تاني سهله ممكن لفترات صغيره ادام بيكون دايما العقل متعلق بالعوده لمصر مهما كانت مشاكلها بس الي عاوز يشوف مشاكل بيشوف والي عاوز يشوف جمالها بيشوفه برضه فيها كل حاجه المهم نسيب لنفسنا فرصه اننا نحس بحاجه غير المشاكل مش نركز عليها بس نشوف الحاجات الحلوه الي فيها هتفرق معانا كتير اعتقد ان اغلب الي بيقنعوا نفسهم ان بره افضل بيهربوا من حاجه اساسيه بيهربوا من مواجهة نفسهم انهم مجبرين لظروف ما علي السفر فبيحاول يقنع نفسه ان بره افضل و في الاخر بيقتنع

مهما كانت في مشاكل في كل حاجه في مصر سواء من ناحية مشاكل البشر في التعامل او مشاكل الحكومه في تنظيم الحياة بتبقي روح مصر مختلفها واحساسنا دايما مختلف بيها وتبقي الغربه اجبار لا اختيار

غزة تحت النار و الحصار ويبقي لنا العار

2009-01-03T10:34:00.002+03:00

قال عبد الله بن الإمام أحمد: وجدت بخط أبي، ثم روى بسنده إلى أبي أمامة قال: قال صلى الله عليه وسلم: "لَا تَزَالُ طَائِفَةٌ مِنْ أُمَّتِي عَلَى الْحَقِّ ظَاهِرِينَ لَعَدُوِّهِمْ قَاهِرِينَ لَا يَضُرُّهُمْ مَنْ خَالَفَهُمْ إِلَّا مَا أَصَابَهُمْ مِنْ لَأْوَاءَ حَتَّى يَأْتِيَهُمْ أَمْرُ اللَّهِ وَهُمْ كَذَلِكَ". قَالُوا: يَا رَسُولَ اللَّهِ، وَأَيْنَ هُمْ؟ قَالَ: "بِبَيْتِ الْمَقْدِسِ وَأَكْنَافِ بَيْتِ الْمَقْدِسِ". وأخرجه أيضا الطبراني

عن جابر بن سمرة، رضي الله عنه، عَنْ النَّبِيِّ صلى الله عليه وسلم أَنَّهُ قَالَ: "لَنْ يَبْرَحَ هَذَا الدِّينُ قَائِمًا يُقَاتِلُ عَلَيْهِ عِصَابَةٌ مِنْ الْمُسْلِمِينَ حَتَّى تَقُومَ السَّاعَةُ". رواه مسلم

اللهم لا تجعلنا ممن خذلهم

يوميات حاج مخالف

2008-12-20T11:13:00.004+03:00

الصور من النت مش فاكر اني مواقع بس بتبين شكل الرمي زمان و دلوقتي و الفرق في المساحه

في الاول يعني ايه حاج مخالف اصلهم هنا في السعوديه كانواعاملين حملة رعب اعلامي لاحج بدون تصريح و التصريح مره كل خمس سنين ( الي يقعد بقي خمس سنين :))) ) وبما اني حجيت من سنتين يعني مفيش تصريح واكيد مش هنقعد خمس سنين يعني علشان نحج تاني يطبقوا القانون ده زي ما هما عاوزين علي السعوديين الي قاعدين ادام احنا ازاي يعني المهم مكنش في حل غير اني ابقي حاج مخالف السنه دي بقي ومن قبل الحج بشهر و الاعلام بدا حملة الرعب الي جابت تاثيرها فعلا كل الناس خافوا يروحوا ما عدا المصريين :))) كل شويه اعلا لاحج بدون تصريح و امير مكه قانون عقوبات زيزياده نقاط التفتيش و ترحيل اي حد يحاول يدخل مكه و فعلا سمنا عن ناس اترحلت الي حاولوا يدخلوا مكه قبل الحج باسبوع
وبما اني حج مخالف مش معني كده اني ابقي حاج مفترش يعني نايم علي الارض لا مش انا :) كلمت صحابي الي جايبين امهم و ابوهم يحجوا نشوف الناس الي متعودين يطلعوا كل سنه وعملنا زي حملة نصها عواجيز كده زيارات بتاع 250 مصري المهم اتاكدنا اننا حاجزين في مكه سكن نضيف حته اسمها العزيزيه جنبنا نفق 600 متر نعديه نبقي في اول مني جنب مسجد الخيف المهم اتحركنا من الدمام يوم الجمعه الصبح علشان نوصل في الزحمه و طول الطريق كل ما ننزل استراحه الاقي بشر مصريين كلهم مخالفين برضه اقول ايه ده هوا الموضوع عادي بقي ولا ايه ---طبعا استراحات كتير نزلناها علشان الناس الكبيره الي معانا --- المهم وصلنا ميقات السيل الكبير قبل الفجر بساعه كده بس بدل ما ندخل الميقات العادي وكان زحمه اجرنا شقق فندقيه وهناك مفترين موسم بقي والساعه للغرفه ب 50 و 100 ريال خلصنا الاحرام و قولنا بسم الله نجرب اول نقاط التفتيش كانت حاجه جميله خالص العساكر عندهم اوامر مفيش عربيه تعدي وفيها حجاج لابسين احرام من غير تصريح بس محدش قال الي ماشي علي رجليه يقوله فين تصريحك وعلشان كده قبل النقطه ب 100 متر نزلنا اتمشينا بتاع نص كيلوا لحد ما العربيه عديت فاضيه من نقطه التفتيش وعادي معدين من جنب العساكر نسلم عليهم بقي وكده وكان ايه بشررررررر ماشين واغلبهم طبعا من مصر و فعلا اكتر من النص ناس كبيره يعني كلهم زيارات مش مقيمين هنا ودول اصلا مش بيطلع ليهم تصريح ولا ينفع يدخلوا مكه اصلا مش عارف ليه المهم عدينا كام نقطه تفتيش بنفس النظام ده غير ان كان في عربيات جيمس بتاعت اهل مكه واقفه في الميقات الي عاوز يدخل من الطرق الجبليه بتدخله دخلنا مكه ظهر السبت كانت رايقه شويه يادوب علي ما وصلنا الشقق الي حاجزينها كان قبل المغرب طبعا ده انجاز في الحج انك تتحرك 20كيلوا في 5 ساعات :)
الشقق الي حاجزينها كانت جميله جدا عادي اكنك في فندق وحمامات نضيفه و عادي خالص لما بقارن تكلفه الحج المخالف ده بالنظام بستعجب من الفرق الكبير يعني عندنا كان تكلفه الحج في المنطقه د الي هي اخر حاجه في المنطقه الشرعيه لمني ب 3600 و درجه أ 8500 ريال فين حين الي كنت فيها 1300 ريال واضح ان السعودين بقيت تجاره الحج عندهم زي مصر كده الحج كله مش يتكلف 10 الاف ريال في افخم حاجه و تلاقي جايبين المصرين في ازبل حاجه و باضعاف السعر حاجه تخنق فعلا ليه الفروق الكبير دي بدل ما نسهل علي الناس نسرق منهم

طواف القدم كان فاضي جدا ان الناس خلصوا وبايتين في مني و الي جاي اغلبه مش عمل طواف قدوم لو حاجج مفرد او قارن علشان دي سنه و يقدر يدخل عرفات مباشر علي قبل الفجر اتحركنا لعرفه علشان نحلق مكان كويس طبعا كان في ناس سبقونا و اختاروا مكان كويس حجزوه وعملنا الخيم وقضينا اليوم هناك وكنا بعاد عن مركز التكدس حولين جبل النور و مسجد نمره وطبعا البعثه المصريه السنه دي الحج كان الاعداد قليله جدا فعلا يعني مسجد نمره كان بيقفل ابواب كل سنه علي الساعه 9 السنه دي لحد 12 مكنش قفل و في اماكن و جبل النور شوفته من بعيد كان فاضي مش متغطي حجاج زي كل سنه
يوم عرفه اجمل ساعه فيه هي فعلا قبل المغرب ساعتها تحس ان بجد ذنوبك بتنزل منك انك بتتغسل انك بقيت انسان جديد بعد المغرب اتحركنا بالباص لمذدلفه وصلنا علي الساعه 12 باليل لو كنا مشينا كنا وصلنا في ساعه ونص بس الناس الكبيره الي معانا مش ينفع في مذدلفه كل واحد معاه اللحاف المحمول بتاعه يستخبي جواه ننام للفجر وطبعا الكل مرهق ونستعد ليوم النحر فالكل نام صلينا الفجر و رحنا للسكن وبما ان السكن قريب من مني دخلت بسرعه لرمي الجمرات عن طريق نفق الي جنب السكن فوجئت ان المسافه قريبه جدا يعني لو كنت في مني في المخيمات الي في الاخر كنت مشيت اكتر وغير كوبري الجمرات و الي اتعمل فيه تحفه بجد وبما اني فوق كوبري اخترت طبعا اني انزل علي اخر ممر و كان العدد فيه قليل جدا ده وصلنا للرمي من الدور التالت بجد مستحيل الفرق انا كنت برمي الساعه 11 كان كل الي معايا بتاع 30 واحد يعني لدرجة اني واقف علي السور بطلع الحصي وافرده و احطه علي السور مش عارف ايه ده فين الزحمع بتاعت زمان لما تدخل الرمي بهدومك وجزمه و نظاره و موبيل تحمد ربنا لو طلعت بالبنطول بس من كل الي انت لابسه :)

بعد الرمي كان في محطه باصات للحرم مباشر للي عاوز يروح مكه ويخلص طواف الافاضه السنه دي خد مني حوالي ساعه من سنتين انا طوفت في ست ساعات الفرق كبير فعلا

واخيرا اتحللنا و لبسنا عادي وجينا بقي لاصعب حاجه البيات في مني طبعا ناس كتير كل واحد يطلع فتوي من شيخ مش عارف فين ان العزيزيه جزء من مني او ان البيات في مني مش ركن ايه كان كل واحد لجنة فتوي متحركه بس ماليش دعوه خدت اللحاف المحمول وعديت نفق لمني علي الساعه 10 باليل وشوفت حته هاديه فوق رصيف بعيد عن الشوارع خالص واستخبيت ونمت فعلا لحد الفجر
تاني اليوم الرمي كان ازحم شويه بتاع 50 واحد بيرموا في نفس الوقت مش عارف ايه الزحمع دي كلها ورغم الفراغ ده لسه في ناس شغاله بفتوي الرمي قبل الظهر ياجماعه دي كانت علشان الزحمه و الناس الي بتموت دلوقتي فراغ مفيش حد بس الاسهل بقي حتي في الحج والبيات في مني برضه كان سهل تاني يوم اليوم الاخير بقي علشان انا متعجل رميت بسهوله و طواف الوداع كان صعب شويه خد بتاع ساعه ونص بس اهون بكتير من زمان بعد نهاية الحج بجد اخر طواف بتحس باحسايس غريبه انك خلصت فريضه ممكن تغفرلك كل الي فات
كل الناس طالعه من اليوم ده ببرد و انفلونزا و ايه كلنا بايضين بس المصرين لازم نزور المدينه الاول يا جامعه الناس الكبيره تعبانه لا مستحيل المدينه طلعنا المدينه الحمدلله ربنا يسرلنا و عرفنا نصلي في الروضه بس المشكله بقي كانت في زياره قبل المصطفي صلي الله عليه و سلم كنت في مفرمه بشريه عندما تذوب القوي الفرديه في محصله القوي العامه تفقد السيطره علي اتجاهك بجد ناس من كل الجنسيات بتزق بطريقه فظيعه انا متوقع ان في ناس كتير اتبهدلت هناك بس الحمدلله ربنا يسرها خلصنا و رجعنا الدمام بسرعه المره دي الكل كان نايم و بردان محدش طلب استراحات
ودلوقتي بعد مرور اسبوع و مازلت العب مع الانفلونزا و البرد بقول ربنا يكتبهالكوا جميعا ان شاءاالله فعلا مواقف لا تنسي

تحياتي

كل عام و انتم بخير نراكم بعد الحج

2008-12-04T16:12:00.002+03:00

كل عام و انت بخير و سعاده ربنا يجعله عيد سعيد علينا جميعا ان شاء الله و السنه الي جايه ربنا يرزقكم الحج ان شاء الله
كمان شويه ان شاء الله طالع للحج ربنا يقدرنا و نقدر نوصل السنه دي سامع انها صعبه جدا و الدخول لمكه بدون تصاريح رسميه صعب جدا بحاول اروح وربنا يسترها ان شاء الله

نراكم علي خير بعد الحج و الزحمه و الفته :)))))))))

تحياتي

جلد الطبيبين - رؤيه من الداخل

2008-11-24T12:45:00.002+03:00

من المواضيع المهمه الي شايف ناس كتير عماله تسأل فيها الايام دي موضوع الطبيبين الي محبوسين و عليهم حكم جلد الناس بتسالني زي ما يكون اي حد موجود في السعوديه الموضوع يبقي عارف حقيقه الموضوع هتكلم عن حاجتين وجهة نظري في الموضوع و الجزء التاني كمصريين هل بنتبهدل هنا

الحكم بالنسبه لي غريب شويه يعني لو الموضوع كان تجاره و اعتداء علي اعراض ليه خد حكم مخفف هنا الحاجات دي فيها اعدام مباشر طيب لو حاجه غير كده ليه الحكم القاسي ده مفيش معلومات للاسف نقدر نعتمد عليها علشان نقول ايه الي حصل بس الي شايفه ان الناس هاجت بعد ما الحكم اتميز يعني بقي نهائي طيب البشر دي كانت فين من اول الحكم النهائي و اول القبض عليه اصلا هي السفاره دي سفاره ناس تانين و لا ايه للاسف الموضوع بقي في مصر حرب اعلاميه وكل واحد عنده مشاكل نفسيه مع الوهابيه او بيكره الدين حتي لقاها فرصه انه يهاجم و هوا مغمض عنيه نظام اهه بص القضاه الشرعين بيعملوا ايه و الشرع بيعمل ايه حل الموضوع ده ان السفاره تعمل لقاء مسجل معاه في السجن يقول الي عنده لو الموضوع فيه حاجه مش هيتحل غير بتدخل من مبارك شخصيا تبقي شفاعه غير كده مفيش حاجه هتحصل الكل هيغلط في بعضه و خلاص والحكم اتميز مفيش حاجه تانيه
رد فعل الناس بقي هنا جميل الناس كلها حسيت بالعزه لما طنط شفيقه قررت مفيش سفر اطباء و عمل بلاك ليست للشركات الي عامله مشاكل مع المصريين لقيت اكتر من تعليق بيقول لو وصلت ان مصر قالت الناس ترجع الكل هيسيب شغله و يرجع مهما كانت الاسباب
بس انا اصلا شاكك ان طنط شفيقه تثبت علي الكلام ده
ناس بتقول السعوديه مش هتفرق معاها لو مش سفرنا دكاتره هتجيب من اي بلد تاني انا بقول اننا عصب الحياة في السعوديه اننا اكبر كفاءات عربيه موجوده غير كده كله مش عربي و الي مستواه نضيف مش هيجي السعوديه هيطلع امريكا و لا اوربا

الي شايفه انها غلطه سفاره من الاول ليه مش دافعت عن كرامة المصرين و سابت الحكم كده هوا فعلا لو كان امريكي او بريطاني مكنش حصله حاجه بس ده غلط ان لو غلطان يبقي يطبق عليه الشرع مش بنقول غلطان و مش يطبق

نيجي بقي للتعامل هنا في السعوديه هل في مشاكل
انا بقالي حوالي سنتين و نص في السعوديه اقدر اقول من الي شايفه ان جزء كبير جدا من السعودين بيحترمونا كمهندسين و دكاتره لدرجة اني فاكر اكتر من مره نقف علي دوريات مرور و نكون غلطانين و يعدوهالنا لما بيشوفوا المهنه بيحسونا حاجه كبيره و الغلطات دي كانت سواقه سرعه فوق 160 ومره سواقه علي السريع بدون رخص اصلا
السعودين بطبعهم مش بيتعاملوا كويس مع العمال فطبيعي العماله تلاقي شويه مشاكل في التعامل زيهم زي الهنود مثلا

المشكله الرئيسيه بقي هنا نظام الكفاله لو اتلغي يبقي مفيش اي مشاكل في الدنيا هنا او علي الاقل يتعدل يعني في الشركات او لما تكون علي كفاله واحد مش تقدر تسافر مصر من غير اذنه ولازم تصريح خروج و افلام و مش ينفع لو لقيت شغل تاني افضل تسيب ده و تروح علشان هيعملك منع من دخول السعوديه سنه دي الحاجه الي السفاره المفروض تضغط بجد فيها ان يتعمل نظام مختلف للكفاله تبقي تاشيرات عمل فقط ادام السوق محتاج الكفاءات دي

طبعا في ناس عنصريين جدا موجودين و دي نسبه مش قليله بس انا مش اتعاملت مع اشكال زي دي لسه بس موجودين والسعوديين نفسهم بيغلطوهم وبيهاجمهم لو تصرفاتهم زادت

اتمني قريب الاقي حد فاهم حقيقه المشكله دي بدون اشاعات ان فعلا حاجه تضايق لو كان مظلوم

تحياتي

مصر التي لا اعرفها

2008-11-02T10:15:00.002+03:00

اهه رجعنا تاني للسعوديه بعد اجازه طويله الحمدلله في مصر بقالي سنتين بنزل اجازات قصيره المره دي كانت حوالي اربعين يوم منهم رمضان و العيد بجد اول مره احس ان مش دي مصر حاجات كتيره اتغيرت في سنتين كنت اسمع ان في تغيرات بس دي اول مره اشوفها واحسها طبعا اول حاجه لاحظتها الغلاء الي مالوش حدود ولحد دلوقتي مستغرب الناس في مصر عايشه ازاي يعني من فين بيقدروا يجيبوا دخل يغطي ده حاجات صغيره حسستني بكده زي سعر زيت الاكل و مسحوق الغسيل ده حتي عصير القصب بقي بجنيه و اتنين ومره لقيته باتنين و نص الي بقي حسيته في مصر الناس مش عارفه تفرح من اول شوية الناس الي بتشوفهم في المطار بيغلسوا علشان ياخدوا اي حاجه و كل سنة و انت طيب لحد الزبالين متعود اول ما انزل المطار يلزق فيك اي شوية ناس رخمه عايزين اي فلوس وكنت دايما بجيب معايا جنيهات علشان امشيهم من جنبي المره دي مالهومش نفس مش عارف ليه اول ما اقول لحد ربنا يسهلك يمشي مش عارف ليه فقدوا الامل ان حد يديهم حاجه الي استغربتله برضه انتشار نوعيات جديده من الجرايم كنت بقعد ما صحابي في ليالي رمضان بيحكولي حاجات شافوها الناس بقيت تتفنن تسرق ازاي من اول عمليات النصب الكبيره الي في اسواق الكومبيوتر و المقاولات لسرقة اي شنطة لابتوب علي كتفك لنوعيات غريبه زي واحد شاف حرامي نط علي ظهر مكروباص و مد ايده سرق شنطة الي جنب الشباك و نط تاني من الميكروباص و هوا ماشي وبيقول دي بقيت منتشره جدا لناس اعرفهم ست كبيره حراميه راكبين موتسيكل شد شنطة ايديها و طلع جري بالموتسكل وايديها متشنكله في ايد الشنطه و اتجرت في الارض بتاع متين متر لحد ما الشنطه اتقطعت وهي جسمها كله اتبهدل
الغريب ان محدش من الي واقفين اتحرك رغم ان كان في بشر كتير وده برضه الي لاحظته في مصر تغير النظره الشعبيه و الاشفاق علي المجرمين نظام خليهم يعرفوا ياكلوا واحد صاحبي بيحكلي انه كان لسه جايب عربيه جديده بقاله اسبوع واقف قدام البيت عربيه باص بتاعت الاجره الكبيره داخله معاكس بهدلتله العربيه الناس اتلمت و فكت سواق الباص منه و نظام احنا ماسكينه و هيركن الباص علي جنب و شوف انت بس عيالك عاملين ايه في العربيه يادوب بيبص علي عياله الناس ماشوا الباص والسواق ونظام ما انت معاك فلوس و جايب عربيه زيروا وهوا سواق غلبان الناس بقيت غريبه بجد
الحاجه الغريبه برضه الي شوفتها انتشار الطلاق بين الشباب من وسط صحابي في سنتين حوالي اربعه اجوزوا تلاته من طلقوا بعد اقل من تلات شهور وناس كتير من قرابيبي خناقات قربت علي الطلاق وكلهم شباب والمشاكل جايه من البنات اغلبها اثبات للذات اعتقد او مشاكل ماليه بس بجد النسبه بقيت عاليه جدا ومفيش حد بيخطب و الي مش مجوز نفسه بس مش ناوي في ظل اسعار الشقق الغريبه
ودي من الحاجات الي مش قادر استوعبها ازاي شقق من اقل من سنتين كان تمنها اقل من 150 الف دلوقتي من 350 ل 400 الف ايه الهبل ده ازاي يعني الشباب ممكن يجيب شقق مش عارف وحتي الايجارات ارتفعت الضعف اقل ايجار جديد الف جنيه منين يعني الشباب يجوزوا ولا ازاي يعيشوا
لاحظت برضه ارتفاع كبير جدا في المرتبات خصوصا في سوق ال البرمجه اعتقد المرتبات عن سنتين تفرق حوالي تلات ل اربع اضعاف ومفيش ناس كتير خبره واضح ان الاغلبيه مسافر بره مصر
دي حاجات معرفتهاش في مصر الي بجد كنت اتمني انها تبقي الي اعرفها

تحياتي

من القاهره احييكم

2008-09-17T17:41:00.002+03:00

قبل اي حاجه كل سنه وانتوا طيبين بمناسبه رمضان متاخره بس يادوب علي ما لقيت وقت

واخيرا بعد رحلة عناء لمدة تلات شهور متواصله من ضغوط العمل وصلنا القاهره
بقالي فتره مش متابع البلوج ولا صفحات كتير من اصدقائي ولكن خلاص فتره الضغط خلصت
انا في القاهره ان شاءالله لمدة شهر واتمني ان اشوف كتير من الناس الي مش عرفت منها غير كلماتهم
لو في اي تجمعات ابقوا قوليلي الله يخليكوا :)

تحياتي واشوفكوا علي خير ان شاء الله

بعدستي : من خلف الاسوار ننتظر الفجر

2008-02-17T13:01:00.001+03:00

من خلف الاسوار ننتظر الفجر

لما يكون للكحك طعم تاني

2007-10-20T09:54:00.000+03:00

الاول كل سنه وانتوا طيبين وعساكم من العايدين و الفايزين
علي راي الجماعه السعودين
:)
مع العيد للغربه طعم تاني صعب كتير و غريب دايما بندور علي اي حاجه تفكرنا ببهجة العيد في مصر
في مصر لما كان حد يقدمك كحك العيد كنت تبص كده وبطنك تقلب نظام هوا مش كفايه بقي
هنا الكحك ليه طعم تاني خالص بجد نادر قوي المصرين الي عندهم كحك مصري مش مضرب سعودي
وبتبقي ايه احلي هديه لو حد جاي قبل العيد و جاب معاه شويه كحك محدش بيصدق نفسه بقي
للاسف الحاجات الجميله في بلدنا مش بنشوفها غير لما بنبعد عنها ساعاتها بنعرف ان بلدنا مش كلها غم لا فيها شويه حاجات حلوه برضه بس احنا مش بنشوفها غير لما نبعد عنها زي الكحك كده

يالا اتمنالكوا كحك سعيد و جميل

تحياتي

ما بعد العوده

2007-09-03T22:48:00.000+03:00

فجاه خلاص رجعت السعوديه رجعت اصحي بدري ورجعت اشتغل واشوف مشاكل و افكر تاني
حاجه متعبه خالص
:)
ايه الي حصل بحاول افتكر ياه من حوالي شهر رحت مصر في اجازه و بالمناسبه دي اول اجازه انزلها لسه طالع من مصر من سنه بس يعني
الايام بجد في الشهر ده عديت بسرعه غريبه جدا كنت عامل حسابي اروح مش عارف فين وفين واقابل مين و مين و اعمل حاجات كتير فجاه الاقي معاد طيارتي بكره ياه الايام عديت كده اهه ديما لما تحب الوقت يبقي طويل مش بتلاقيه
العوده للوطن السنه دي كان ليها طعم مختلف حسيت بفروق كتير فعلا في البلد الناس مخنوقه اكتر و الحياة بقيت اغلي و الدنيا زحمه جدا بس فعلا الملاحظ خنقه الناس من الحكومه بجد زياده قوي والكل بيتكلم زمان كان في خنقه بس الكلام مكنش كتير كده
بس بجد رغم ده كله وانا مسافر ولحد دلوقتي بفكر هل يا تري اكمل في الغربه و لا لا هل ارجع لبلدي رغم كل الحاجات الخنيقه الي فيها ولا اخليني هنا حاجات مكنتش متخيل اني هفكر فيها وانا الي كنت سايب مصر من خنقتي من الي بيحصل فيها بس بجد رغم كل الألم وجودك مع اهلك وروح مصر بتفرق كتير ودلوقتي بفكر يا تري هرجع استقر تاني امتي

مرحبا بيكوا تاني من الغربه و الوحده ونعاود البث بعد توقف قصير ناخد فيه نفسنا

تحياتي

هنا القاهره

2007-08-02T01:46:00.000+03:00

واخيرا زيست
:))
هنا القاهره كان معكم مراسلكم من القاهره و في القاهره دلوقتي
وعدنا الي الزحمه والحر وللناس الي بنحبهم و لبلدنا الي برضه غصب عننا بنحبها
يادوب وصلت من كام يوم واتبهدلت شويه علي ما خدت الاجازه اصلا علشان كده كنت مختفي
ياريت بقي كده الاقي لقاء مدونين الشهر ده نفسي اشوفكوا
سلام يا بشر

الرجال من المريخ النساء من الزهره

2007-06-17T09:04:00.000+03:00

ازيكوا وحشتوني خالص
معلش علي الغيبه الطويله عنكوا صحابي شويه مود مضايق علي شويه بهدله شغل ما هوا الصيف دخل بقي ربنا يستر

الناهرده حبيت اشراكوا كتاب قريته من فتره كان رائع
كتاب الرجال من المريخ النساء من الزهره
عاوز تفهم مشاكل الفهم بين الرجال و النساء عاوز تفهم ليه دايما في مشاكل
طيب عاوز تدور علي اسلوب جديد تفهم بيه البنات اقري الكتاب ده
مقدمته اسمها
دليل عملي لتحسين الاتصال و الحصول علي ما ترغب في علاقات
ناس كتير اتكلمت عليه لو عملت بحث في جوجل هتلاقي كتير قوي بيقولوا انه رائع
الكتاب حملت نسخه بي دي اف منه وطبعا دي بتشتغل علي اكروبات ريدر

افعص هنا كي تحصل عليه
:)))))))

استني حوالي 30 ثانيه هتلاقي كلمة دونلود ظهرت

تحياتي

توصل بالسلامه يا منعم

2007-05-31T11:16:00.001+03:00

تحديث اخير

حسب مدونة انا اخوان ومواقع الاخبار فقد وصل عبدالمنعم لمنزله اليوم

اجمل التهاني له ولعائلته وفي انتظار اشراق شمس الحريه علي الجميع

إخلاء سبيل المدون المصري عبد المنعم محمود
وجميع المعتقلين علي ذمة قضية معهد التعاون
بقرار من النائب العام المصري
أصدرت نيابة أمن الدولة العليا اليوم الأربعاء قرارًا بالإفراج عن طلاب معهد التعاون الزراعي وأربعة من قيادات الإخوان كان تمَّ اعتقالهم في نفس القضية، وهم الدكتور محمد عبد العال الأستاذ المساعد لجراحة التجميل بكلية طب عين شمس والدكتور سالم رمضان صيدلي، والمهندس نادر توفيق استشاري أعمال هندسية، والمدون عبد المنعم محمود.وجاء قرار النيابة بدون عرض المجموعة عليها، وفي غير موعد العرض؛ حيث كان مقررًا عرضهم على النيابة الأسبوع المقبل.

عبدالمنعم واعتقالات لا تنتهي

2007-04-16T15:29:00.000+03:00

امبارح بس قبضوا علي عبدالمنعم
قبضوا عليه بعد ما ركب الطياره بعد ما عدي علي كل الاجراءات بس في الاخر جابوه و دلوقتي خد حبس 15 يوم
طيب هوا مين عبدالمنعم اصلا الي هتلاقي نص المدونين كاتبين عنه
عبدالمنعم من الشخصيات المؤمنه بقضيتها المنتمي بشده للاخوان ومن القلائل الي اغلب الناس بتحبه وتحترمه
عن نفسي كنت من الناس الي بحبهم و اتابع اغلب كتاباته و نشاطاته علي المدونه و علي الفضائيات ومن اول الناس الي لما فكرت اضيف مدونات مفضله لي كان موجود فيهم
عبدالمنعم شخص يستحق الاحترام لانه مؤمن بما يفعله ويعمل علشانه بغض النظر عن اتفاقنا او اختلاف وجهات النظر مع حركة الاخوان
عبدالمنعم اتسجن قبل كده و اتعذب بطريقه انتقاميه و شهاده عن التعذيب لو سمعتوها هتقرفوا من الحكومه اكتر بكتير ما انتوا اصلا قرافنين منها
انا بكتب بس عنه علشان الناس تعرف قضيته تعرف هوا دلوقتي عامل و تدعيله
عبدالمنعم من الاخوان و ناشط في مجال حقوق الانسان و مراسل لقناه الحوار و اخيرا من اشهر مدوني الاخوان علي الويب
عبدالمنعم والده في مرض الموت كان بيعمل فحوصات لزرع الكبد و بسجن عبدالمنعم ربنا يسترها علي ابوه
اسمعه و هوا بيكلم عن التعذيب

واسمع اخر حوار علي الهوا معاه قبل ساعات قليله من اعتقاله واثناء مطارده الامن ليه

واخيرا رساله مصوره وهوا بيحاول يشوف والده بعد ما الامن هجم عليه ومش لقاه و كان مطارد

ادعوا لعبدالمنعم
ادعوا لابوه
والعنوا الي سجنوا البلد

يارب استجيب

تاجات لا تنتهي

2007-04-06T20:52:00.000+03:00

عندي تاجات متاخره من زمن طويل قوي يالا نخلصهم في السريع كده
اول تاج كان من الجميله انجي سمراء النيل
اسم مدونتك؟
طبعا زي ما هوا اسمه أبحث عني او البحث عن الذات ده غير ابحث عني بتاع ماجده الرومي يعني
لماذا اخترته.. ماذا تقصد به؟
هدف المدونه اني ادور عن نفسي افتش عليها او ابحث عن ذاتي بين كلماتي و افكاري و ذكرياتي يمكن في يوم الاقيها
هل فكرت في إغلاق المدونة.. والسبب؟
انا لسه جديد ملحقتش افكر اقفلها بس هيا مش مجرد كلام دي حلقة تواصل مع ناس كتير جميله مش بشوف غير كلامتهم
صورتك ف المدونة، رمزيتها؟
مفيش صوره لسه
طبيعة كتابتك في المدونة بشكل عام.. سياسة.. قصة.. عبث.. كلام فاضي؟
كتابات شخصيه كل ما يخطر علي بالي
لماذا تدون أصلاً؟
التدوين فرصه ان الواحد ينظم افكار و يرتبها و يبص لحياته بطريقه تانيه يقدر علي اساسها يشوف ايه الي يستحق يتكتب و في نفس الوقت اسلوب الكتابه نفسه بيتطور
أحلى جملة قيلت لك في وصف مدونتك؟
كل واحد كتب عن المدونه بيبقي كلامه احلي كلام انه نابع من القلب
التعليقات بالنسبة لك.. أهميتها؟
مهمه جدا اني بحس انها تواصل مع ناس جميله فكرها قرب من فكري نقدر نكتب من غير ما نعرف بعض بس عاوزين نكتب
أحلى بوست كتبته.. ضع اللينك.. ثم اذكر لماذا؟
لم ياتي بعد
أفضل مدونة قرأتها.. يمكن اختيار عدة مدونات؟
كل اللينكات الي علي جنب المدونه تعتبر اجمل حاجه في عالم المدونات بالنسبه لي
أفضل بوست قرأته.. يمكن اختيار أكثر من بوست.. ومتنساش اللينك؟
اي بوست بيكلم عن مشاعر شخصيه بيعجبني
هل خسرت صديق بسبب كتابة هنا؟
مفيش غير اتنين بس يعرفوا البلوج و يعرفوني و ان شاء الله مش هخسر حد
حد قل أدبه ف التعليق.. إيه رد فعلك؟
لا الحمد لله
أسوأ مدونة.. الإجابة إجبارية.. ويمكن اختيار عدة مدونات..
كل مدونات المثلين و المثليات واللادينين واي حد بيستخدم كلمات قبيحه في كل كلامه
أسوأ بوست.. لازم تجاوب.. ويسمح بتعدد الاختيارات؟
:) لم ياتي بعد
أسوأ مدون.. ما هو حاتجاوب حاتجاوب؟
ايه التاج الرخم ده
:)
الاسوء بنساه دايما مش بفتكره

وده كان نهايه اول تاج
التاج الي بعده جاي من شرمين فوضي الحواس
ده تاج قديم كنت قولت هربت منه بس شكلها مطارده
:)
اية اللي حيحصل لايميلك لما تموت ؟
ولا حاجه الايميلات المجانيه هتقفل
اديت الباس وورد لحد قبل كده؟
في ايميل منهم الشخصي اه الباقين لا اصل انا عندي بتاع خمس ايملات شغالين كلهم
لو اه كانت طبيعة علاقتك بيه اية؟
مراتي يا بيه لدواعي التفتيش الامني
:)))))))))
اسمك؟
عبدالله
اسم الدلع المشهور وسط اصحابك؟
كتير بس الاكتر عبود و فيه بيدوا
عمرك ؟
سته وعشرون عام و سبعة اشهر و اثني عشرة يوما حسب التوقيت العالمي للسعوديه
برجك؟
اول يوم في العذراء
حد يعرف بقي ايه الخصائص الخفيه للبرج ده
مجال دراستك؟
حاليا برمجه
شخصيتك نوعها ايه؟
هادئ مجنون مستمع جيد ومتكلم غير جيد
:)
المود بتاعك؟
ده غير موديل العربيه يعني
:)))
وقت فراغك بتعمل فيه ايه؟
يومي سهل جدا متقسم بين الشغل و النوم والانترنت
:)))))))))
وغالبا اي حد هيفتح الماسنجر في اي وقت من اليوم هيلاقيني اون لاين
الاكلة المفضلة؟
الملوخيه و البيتزا و المنبار
بس بقالي كده بتاع تسع شهور مش كلتهم حد يتطوع و يبعتهم دي اتش ال بقي
:)))))))))
الصفات اللي اخدتها من بابا؟
يعني شكلي بصفه عامه نسخه كامله وخدت منه الهدوء و الاستماع الجيد و العند
:الصفات اللي اخدتها من ماما؟
الطيبه وحب الفقرا وحب القران
اكتر6حاجات بتكرهها؟
الكذب
الخيانه
المكر
الغرور
اللئم
البخل
الظلم
اكتر 6 حاجات بتحبها؟
طبعا حب ربنا و رسوله مش بيتحط علي الليسته انه اكبر من كده
اهلي
صحابي
النت
السفر لمكه
مساعدة البشر
سماع مشاكل الناس
الشغل بالنسبة لك ايه؟
المجال الي تقدر ثبته فيه ذاتك و تقوي بيه ثقتك بامكانياتك
السفر؟
السفر القصير جميل و الطويل اتكتب علينا
هل لديك اقوال اخري؟
اه مين الغلس الي عمل فكره التاجات دي اصلا
:)))))))))))

وده نهاية تاني تاج

الي بعده من سمراء النيل برضه
اه منك يا انجي في التاج تلاته في واحد ده
هل كنت طالب شاطر فى المدرسة
اه كنت طالب شاطر في اغلب مراحل الدراسه
ايه كانت احب مادة و اكره مادة ليك فى المدرسة و الكلية؟
احب ماده الرياضيات و الفيزياء
وبكره الكيمياء
وفي الكليه اجمل حاجه مواد التسويق و اكره حاجه بقيت المواد
:)
كنت عايز تتطلع ايه وأنت صغير ؟
مهندس كمبيوتر

ده كده اصغر تاج و خلص
الي بعده بتاع ستات ماليش دعوه بيه
واخيرا
هل تسعد عندما يمرر لك احدهم تاج؟
بغض النظر عن ان التاج حاجه رخمه بس ان حد يفتكرك حاجه جميله
هل مقدار سعادتك أو شعورك ايا كان- عند تمرير التاج لك يختلف حسب المدون الذي يمرر لك التاج؟
كلهم اخواني
:))
هل تستمتع عند إجابتك عن أسئلة التاج
يعني حسب نوع التاج في حاجات منها بتشغل تفكيرك
هل ترى للتاج أهمية حقيقية؟
اه طبعا انك تخنق علي صحابك
هل فكرت في عمل تاج خاص لك من قبل؟
لا
هل تفضل قراءة اجوبة التج عند المدونين الاخرين؟ أم لا تهتم سوى بالتدوينات الأخرى فقط؟
اه بستمتع بيها جدا بتفرج عليهم وهما بيتعذبوا
عندما ترد على التاج ما الذي تراعيه اكثر؟
ولا حاجه ممكن اراعي ازود الكاتشب بس
هل تحرص على قراءة اجابات من تمرر لهم التاج ؟ و هل تغير إجابتهم للتاج شيئا في ادراكك لهم ؟
مش همرر التاجات لحد
:)
هل تلتزم حرفيا بأسئلة التاج ؟
اه
ما هي نوعية التاجات التي تفضلها؟
تاجات الماظ
تمرر التاج ده لمين؟
ولا حد

واخيرا انتهينا
و كان في تاج بتاع الفضايح الخمسه من عند شرمين و دع غير قابل للنشر بقي
:)

وبمناسبه انتهاء موسم التاجات احب اهدي اغنيه بلاش كده لكل البشر الي قاعده وشرفونا و اتفرجوا علينا
كان معكم مراسلكم من خلف الكي البورد و بجور التاجات

تحياتي

متي تموت الاحلام وتنتهي الامال

2007-03-20T21:49:00.000+03:00

يقول الشاعر
اعلل النفس بالآمال ارقبها ما أضيق العيش لولا فسحة الأمل
طيب الامل ده بيعمل ايه في النفوس يعني
ده القوه المحركه للحياة ده الي بيخلي الموظف يشتغل و الفلاح يتعب في الارض ده الي بيخلي المؤمن يمنع نفسه عن شهواته امل في الاخره
يحصل ايه بأى لما نتعب من الحلم ونتعب من الامل
هل بيبقي دخلنا في الاحباط و اليأس
طيب هل اساسا في لحظة بنتعب فيها من الحلم والامل
اه لحظات انكسار الامل
اللحظة اللي بتبص فيها للحلم وتبتسم بسخرية واستخفاف
يعني ايه الكلام ده و امتي
عارف لما يكون طالب مجتهد و مستني النتيجه واول ما تطلع يلاقي نفسه ساقط هيحس بايه ساعتها
يحبط
كان مستني امل وانكسر
هي دي اللحظه الي بيسترجع فيها كل تعبه في طريق الامل ويعتقد ان مفيش جهد اكبر من كده لتحقيق الامل ده مره تانيه
هي دي لحظة انكسار الامل و لحظة التعب من الحلم
طيب هل ده ضعف ايمان
اكيد انك ساعتها تفقد الايمان بالقدر
ساعتها بتفقد الرضا بربنا و عن قدرة
طيب ليه ايه الي بنعمله في لحظة انكسار الحلم
الفرق بين كل انسان و التاني هوا في اللحظة دي
علشان كده بيقولوا دايما انما الصبر عند الصدمة الاولي

طيب دي لحظات انكسار الحلم هل كل حياتنا بتستمر علي كده
مش لازم كل انكسار للحلم سببه مصيبه او مشكله
الياس من حلم بيموت الاحلام

زي ايه كده

زي نحلم مثلا اننا نعيش في بلد ديمقراطي
اكيد جيلنا كله جاله يأس من الحلم ده مشوفناش طول حياتنا غير رئيس واحد هنعمل ايه يعني

نيجي بقي للنهايه
الإيمان يبعث في النفس الأمل
و دي الحقيقه الوحيده الي بتخلينا نحلم تاني بعد ما حلمنا ينكسر قوة الايمان والثقه ان كل الاقدار خير هي الدافع الاخير للاحلام

ياتري بقي بتحلموا بايه

تحياتي

نكت بالسعودي

2007-03-07T01:15:00.000+03:00

الناهرده بسرعه كده هقولك علي نكتيتتين بالسعودي اهي فرصه تعرفوا النكت هنا شكلها ايه
:)))

اول واحده بتتكلم عن موضوع السعوده و طرد الكفاءات الغير سعوديه
بيقولك مره حبوا يطبقوا السعوده علي جنينه الحيوانات طردوا كل الحيوانات و حطوا جمال
:)
ده بجد الواقع الي هنا سعودين في كل حته مش بيعملوا اي حاجه و خدمات متدنيه جدا بسبب ان مفيش عماله بتفهم في اي حاجه ده حتي في الحج اتبهدلنا جدا في التنقالات قال ايه مفيش اي فيز سواقين و مظطرين يعتمدوا علي سعودين ودول طبعا شباب صغيرين و اخر مره كان بيسوقوا موتوسيكل مش اتوبيسات

النكته التانيه بقي تريقه علي نظام الكفيل

بيقولك مره جابوا اسد في جنينه الحيوانات و كل يوم يقدموله موز موز الاسد مستني لحمه مفيش موز برضه زهق راح مكلم المدير بيقوله انا اسد عاوز لحمه مش موز قاله اسكت يا هاالاجنبي احنا جايبينك علي فيزا قرد
:)

ده فعلا توصيف ساخر لنظام الهبل المسمي بالكفاله تحكم كامل من البشر في اي حاجه اهم يطلعوا شويه خنقتهم في خلق الله بدل ما يتكلموا في السياسيه رشوه شعبيه يعني

تحياتي

مكه - احاسيس ومشاعر اخري

2007-02-28T00:10:00.000+03:00

بمناسبه بقي اني لسه راجع من العمره قولت انقلكوا شوية احاسيس عن العمره
ناس كتير بتتكلم عن العمره و عن ازاي تعملها و مش تعمل ايه و تعمل ايه و السنن و الواجبات و الاحكام الشرعيه ده كله جميل ولازم تركز فيه قوي و عجبني تعليق عن الموضوع ده بيقول ده انت لما بتشتري غساله جديده بتقد تقري الكاتلوج وانت رايح لربنا مش عاوز تعرف تعمل ايه بس للاسف التركز لما يكون كله علي الاحكام بتنسي استشعار لذه الموقف بتنسي الروحانيات و ده للاسف الي محدش بيكلم فيه كتير دي كانت اول ملاحظة عن العمره ان في الاول هتبقي مرعوب من انك تغلط بس انسي كل ده و ركز في كل خطوه جانبها الروحي ايه علشان تحس فعلا بقيمة ان رايح بيت ربنا
طول الطريق لمكه بتبقي قاعد تفكر في حاجتين امتي الطريق يخلص بقي --بالمناسبه انا اه في السعوديه بس الطريق برضه طويل بتاع 1400 كيلو يعني تيجي من مصر اقرب :)))---- تاني حاجه بتقي شاغلاك هتدعي ربنا تقوله ايه وعاوزه منه ولو اول مره تعمل عمره هتشغلك حاجه تالته انك قاعد بتذاكر من الورق تعمل ايه في العمره رغم انها سهله بسيطه جدا
اول ما بتقرب من الميقات و بتستعد انك تلبس الاحرام بتنسي كل حاجه اول ما بشوف مكان الاحرام الي يجي في بالك ياه هوا الرسول و الصحابه كلهم داسوا علي الارض دي الي انا واقف عليها و وقفوا هنا يلبسوا هدوم الاحرام علشان يتحركوا لسه المسافه الباقيه دي كلها راكبين الجمال او ماشين بتحس ان تعب العمره بقي دلع بالنسبه للي قبلينا شافوه بمجد ما تغتسل يااااااه بتحس انك بتغسل نفسك من الاثام علشان تروح لربنا جديد وطاهر كده تحس ان الميه دي بتغسلك بجد علشان تبقي ابيض وتلبس لبس الاحرام الابيض علشان تستعد انك تروح بيت ربنا و انت واقف بره شايف الناس كلها لابسه زي بعض لازم تفتكر علي طول حكمه الاسلام في التساوي هنا بقي مفيش فرق بين امير و غفير بين عربي و هندي وباكستاني وامريكي كلنا واقفين لابسين شبه بعض مش يبفرق بينا الا كل واحد قلبه عامل ايه
اللحظه العظيمه بقي لما تقرب من مكه و تلاقي مكتوب يافطه ممنوع دخول غير المسلمين تحس انك بجد في مكانك الصح هنا ربنا اصطفاك بحاجه مميزه عن باقي الناس هنا احنا بس الي مسموح لينا نقرب و ندخل الارض المقدسه احساس عزه و فضل من ربنا انه اكرمنا نكون مسلمين و كمان اصطفانا من بين مليارات المسلمين و سمح لنا ندخل بيته الحرام
احساسيك كلها بتتغير اول ما تدخل مكه فعلا اول ما تشوف بيوتها و شوارعها و تشوف المسجد الحرام من بعيد يا الله بقي هنا التاريخ الي عمالين ندرسه في السيره كله دار علي المنطقه الي واقفين فيها دي بقي هنا المشركين كانوا بيؤذوا الرسول و الصحابه بقي هنا الناس دي تعبت و جاهدت علشان الدين يوصلك احساس غريب و قشعريره التاريخ بتاخدك لعالم غريب تاني
اللحظه الفاصله دايما في العمره بتكون اول ما تشوف الكعبه ياه هنا طاف الانبياء وهنا زمزم وفي السماء بنيت الكعبه مقابله للبيت المعمور في سماء الذي تطوف حوله الملائكه هن المركز الي بنطوف حوليه زي الالكترونات في الذره بتلف حول الذره ياه احساس جميله بالعوده لمركز الروح اكنك جاي تاخد شحنه و طاقه علشان تعرف تكمل بيها حياتك و مع انخراطك في الطواف و تقبيلك للحجر الاسود بتتعلم اسمي معاني الطاعه و العبوديه و الانقياد لله في اللحظه دي فزي ما قال احد الخلفاء والله اني لاعلم انك حجر ولولا ان الرسول قبلك ما قبلتك هوا ده الانقياد لما تلاقي عقلك يقولك ده حجر ايه مشكلته يعني بس العقيده بتقولك ده مش حجر عادي بتنسي كل حاجه غير دي و بعد ما تخلص الطواف و تكون دعيت بالادعيه الي افتكرتها و تروح تشرب زمزم تحس بمعجزة الميه دي بجد ازاي عين صغيره شرب منها كل الناس بالملاين من الاف السنين ولسه لحد دلوقتي محافظه علي الميه وبنفس القوه دي معجزه لوحدها فعلا و تقعد بقي متحير مع كل كباية زمزم بتشربها ياتري تكون ايه النيه ما الرسول بيقول زمزم لما شربت له يبقي لازم تنتهز الفرصه و تشوف تشربها ليه
بعدها بقي السعي بين الصفا و المروه اكتر حاجه بتبهرك فيه انك بتحس فعلا بمدي التعب الي تعبته ستنا هاجر و هي بتدور علي الميه لابنها في المنطقه دي من الصحرا و كانت موجوده تنفيذا لامر ربنا و رغم كده مش اتكلت ان ربنا هيرزقها علشان هوا امر بكده لكن سعت كمان لحد ما ربنا رزقها بزمزم مع انتهاء مرحله السعي بتيجي بقي اخر حاجه انك تحلق شعرك الشعر ده دايما الي عمال تحافظ عليه و تسرحه علشان يبقي شكلك حلو و مش عارف ايه هنا بقي ربنا قالك شيله وبتقاد لامره و تشيله بالموس تحس بحلاوه الطاعه و في نفس الوقت بتزعل علي شعرك و بجد كتير من صحابي بشوف دموعهم اول ما يبص يلاقي نفسه من غير شعر طبعا اول مره بعدها بيتعود
اتمنالكوا جميعا انكوا تمروا بتجربه العمره من الناحيه الروحيه ليها طعم تاني خالص
واخيرا عاوز تقري مقال رائع عن الكعبه و مكه في مقال علمي اسمه دلائل التوحيد في طواف الكون ياريت تقروه
http://www.islamonline.net/Arabic/Hajj/1427/topic_01/04.shtml

تحياتي

اليها تهفو الروح

2007-02-21T00:07:00.000+03:00

لما الدنيا تضيق بيك لازم تروحلها
لما تحس ان قلبك قاسي شويه برضه لازم تروحلها

لما تكون عاوز تكلم الملك و تطلب منه برضه هتفكر تروحلها

ديما قلبك بيهفهف كده لما تسمع اسمها ودايما تفكر ياريتك كنت جنبها

هي مين دي
مكه اليها تهفو الافئده

اشوفكوا بعد ما ارجع من العمره بقي ان شاء الله

في امان الله

التسامح -الطريق نحو السعاده

2007-02-13T01:47:00.000+03:00

الناهرده البوست هيبقي صغير علشان الناس اكيد زهقت من البوست الطويل
حاجه كانت دايما شاغله بالي من زمان قوي يعني ايه سعاده وازاي نقدر نوصل للسعاده بسهوله هوا ايه الي بيجيب السعاده قعدت ادور كتير علي الي ممكن يجيب السعاده في الحياة لقيت كل الناس الي معاها الي هيا عاوزاه مش بتحس بالسعاده الناس الوحيدين الي بيحسوا بالسعاده فعلا الي قريبين من ربنا طيب هوا الطريق لربنا سهل كده اي حد يفكر يروح مش محتاج منه جهد طيب ايه اول خطوه الواحد يبدا بيها علشان يجهز نفسه للسعاده و الايمان اعتقد من الي شوفته انك تشيل من قلبك كل احساس بالظلم حاسس بيه في حياتك كل احسايس الحقد و الرغبه في الانتقام بنسميها المشاعر السلبيه الي بيتاثر علي البناء النفسي للشخص وده ليه تاثيرين مهمين قوي اولهم ان وجودهم بيسبب جهد نفسي كبير جدا و التانيه ان المشاعر السلبيه بتحجب عنك ناس تانيه ممكن تكون مستريحلهم بس وجود كمية كبيره من مشاعرك السلبيه بياثر علي حضور شخصيتك وبينفر الناس منك
تخيل نفسك عايش مش بتكره حد تخيل قلبك مش بيحمل اي ذره من الكره و الحقد لاي حد شوف قد ايه هيكون بالك مرتاح سامح اي حد غلط في حقك مش علشانه هوا لا علشان نفسك انت تكون سليمه وصافيه فالمشاعر السلبيه لا تضر احد سوي من يحملها بمجرد ما تنقي قلبك هتلاقي نفسك مش شايل هم و تبقي حطيت رجلك علي اول طريق السعاده
مع تمنياتي بحياة سعيده

علي الهامش
التاخير عن التدوين كان سببه اللعب مع بلوجر بيتا وزي ما معروف مشكله الهرتله و العربي الي فيه اغلب مشاكله حليتها ناقص بس اسمي بالعربي مش بيظهر في الكومنتات لو حد عنده طريقه ياريت يقول
:)
تحياتي

ترانيم للحياة و اخري للمات - بين الحياة و الموت شعره رفيعه مثل التي بين الواقع و الحلم

2007-02-02T21:42:00.000+03:00

ملحوظه 1 في بدايه كلامي ده بوست كاتبه لنفسي مجرد نقشه صغيره علشان منساهاش في زحمة الدنيا
ملحوظة 2 دي اول مره احاول اكتب من الواقع فمحدش مظطر انه يتعب نفسه و يقرا البوست ده

ترررررررررررررررررررن يادي النيله المنبه بيرن زي كل يوم لازم في الوقت الي مش عاوز تصحي فيه في عز ما بيكون الحلم شغال و قبل لقطه النهايه لازم يضيع عليك المشهد الاخير افتح عيني استوعب اني نايم علي السرير مش في حته افكر هوا كنت بحلم ما علينا مش فاكر افضل نايم شويه احاول افتكر كنت بحلم بايه طبعا الذاكره اتمسحت اوبا الساعه قربت علي تسعه انط بسرعه من السرير و انا عمال افكر ياه الناهرده الخميس بكره اجازه مش مشكله هتنام براحتك بسرعه اجري اخد الشاور اليومي بسرعه انط في هدومي علشان اروح الشغل وزي ما الناس اتعودت لازم ادخل متاخر دايما ولازم اعدي علي كل واحد ياخد مني كام كلمة تريقه علي الصبح عادي بقي حبه ضحك علي الصبح بينفعوا برضه يبدا يومي العادي شويه جرايد علي الصبح شويه شات مع صحابي ومع اهلي وبرضه شويه فرجه علي البومات الصور اهه الواحد يفتكر شويه ذكريات برضه من مرحله ما قبل الغربه وبرضه بالمره افتكر انا كنت قبل ما انسي نفسي وارجع ادور عليها تاني خلصنا لعب بقي ندخل في الجد شويه بهدله شغل من كل حته وايملات رايحه و جايه و تلفونات و دوشه وفي النص كده الواحد يفكر ياتري لو بكره انا مش موجود الناس دي هتعمل ايه طبعا الرد الطبيعي ياعمي خلص هيا الدنيا بتقف علي حد يعني بس لازم شويه احساس كده من النفس ان لينا اهميه في الدنيا و لا الدنيا هي الي ليها اهميه عندنا نخلص بقي ساعات الشغل الكئيبه دي علشان يجي معاد التجمع القومي للبائسين الي هما احنا يعني اتصل بالناس الي عايشين لوحدهم زي كده ومعايا في الشغل نتجمع علشان نتخذ القرار المصيري الي الناس كلها مستنياه وهوا هناكل ايه الناهرده طبعا قدمنا خيرا كتير ننقي منها من الاخر مفيش غير تلات محلات ينفع نشتري منهم نتفق علي اي حاجه في السريع علشان نلحق نجيب اكل نروح نقعد عند اي بيت من بيوتنا ناكل وكل واحد بيفكر انا ايه الي جابني الحته الغريبه دي ما انا كنت قاعد في بيتي كل يوم اكل ومتهني ايه الي انا بعمله ده كل واحد فينا من مكان مختلف كل واحد فينا ليه تخصص مختلف مفيش حاجه بتجمعنا غير الملل و دي اول مره اكتشف فوائد للمل نخلص اكل نبص لبعض و عادي بقي مفيش غير التلفوزيون اي حد فينا يمسك الريموت نعدي علي كل قنوات الدش مفيش اي قناه تعجبنا نفضل لحد ما نزهق و نسيب اي حاجه شغاله و اهي دوشه تجيب اي موضوع نفتحه لحد ما في الاخر نفتكر ان الوقت خلص بجد الساعه قربت علي تلاته نقوم خلاص بقي كل واحد يروح علي شقته واحد يبصلنا ويقول مفيش مره كده نقوم كلنا نصلي الفجر نضحك و كلنا عارفين ان علشان نصحي يبقي الموضوع صعب اروح الشقه اترمي علي السرير احاول اغمض عيني افكر في اي حاجه علشان انام بسرعه مفيش النوم مالوش مزاج يجي الناهرده هييه فين و فين علي ما ابدا اشوف اول النوم اشوفه من بعيد كده جاي عاوز يشرف اتبسط خلاص بكره الجمعه و هعرف انام شويه حلوين يادوب علي ما ابدا اسيب نفسي للنوم اسمع اذان الفجر جاي من بعيد ياه حتي لما النوم يجي مش نعرف نستمتع بيه و الشيطان بقي يلعب لعبته خليك و هتنام بسرعه انت مش قادر انت سهران افضل شويه في السرير لحد ما اعرفه انه الشيطان اقوم اتوضي و انزل للمسجد يوم الجمعه بالذات متعود البس جلابيه بيضا اتعودت دايما كده حتي لو الجو برد البسها و انزل اقوم يارب مفيش مطره علشان اقدر انزل بيه الجمعه كمان اروح للمسجد نفسي يبداوا ويخلصوا بسرعه بدل ما انام و انا واقف ادخل ابص في المسجد علي الشباب اصحابي مفيش حد فيهم موجود ادور علي اي حد من اهل البلد اعرفه علشان اسلم عليه مفيش برضه وفي الاخر علي ما طلعت قدام لقيت في اول صف شيخ اعرفه شكله كده جايب علي الاربيعنات بس دمه خفيف جدا وكلامه غايه في الروعه شغال هوا في الارشاد و الدعوه و عرفت انه في مجال ظريف قوي انه مهتم جدا بالمساجين و اسرهم معروف عنه في المنطقه كده فكرت اسلم وبعدين مش لقيت مكان جنبه قومت قعدت في الصف الي وراه قولت الحق اسلم عليه بعد الصلاة شويه بدانا اصلي و الشيطان يلعب معايا مش قادر افتح عيني عاوز انام و في نفس عاوز اركز شويه في الصلاة كان هاين عليا انده الامام قبل ما يبدا اقوله يا حاج انجز و اقري قل هوا الله احد يالا مش مشكله هما هنا علي العموم بيصلوا بسرعه خلصت الركعه الاولي احمد ربنا اني مش نمت في السجود الركعه تانيه و لسه في محاولات التركيز علشان اقدر اكمل الصلاة و عيني مفتوحه ركعنا و سجدنا خلصنا سجود قعدنا للتشهد خلاص ظبط نفسك يا عوبد كلها كام دقيقه و تبقي في السرير في نص التشهد كده لمحت الشيخ الي اعرفه الي حكيت عنه من شويه لسه ساجد استغربت قوي بس قولت اكيد بيدعي ربنا و استغرق في الدعاء محسش بينا ياه خساره اني ملحقتش اسلم عليه و قولته يدعيلي كان زمان خدتلي دعوتين ينفعوا في الايام الغريبه دي شويه و الامام خلص خلصت الصلاة و مش مركز خلاص هقوم عاوز الحق اروح انام وانا لسه بقوم المح الشيخ ده لسه ساجد استغربت كتير و لقيت كذا واحد لاحظ الموضوع ده قولت عادي خير كنت الاقرب قولت اهزه كده او اي حاجه تلاقيه كان عاوز ينام هوا كمان و نام في السجود رحت اهزه فجاه لقيت جسمه بيتحرك و بيميل علي جنبه الناس كلها اتخضوا الي جنبه و انا اتسمرت مكاني علي ما فردوه علي الارض و بصيت علي عينه ملقتش فيها بريق الحياة لسه واقف متسمر شايف الدنيا شريط فيديو بيعدي من قدامي مش مصدق ايه الي بيحصل ده مستحيل يكون واحد قدامنا مات كده مستحيل ده كان ساجد معانا ازاي يعني يموت و هوا بيسجد تلاقيه تعبان بس وشويه و هيوفق علي ما قدرت احرك نفسي كانت الناس عاوزه تشيله يوده مستشفي بسرعه كنت لسه قريب منه حاولت اركز و اسنده بيني و بين اتنين كمان علشان نطلعه اول مره احس في حياتي برعشه من الموت ايه ده انا مش قادر امسك رجلي شويه كده و عاوز حد يشيلني ازاي ده مش انا اكيد كنت دايما بفتخر اني مش من الناس الي بتخاف من طقوس الموت كنت عادي بقف في تغسيل اي حد اعرفه مات و كنت عادي بدفن ناس كتير معروف بكده عند صحابي فكل ما يتزنقوا في ميت كانوا بيتصلوا بي ايه الي بيحصل المره دي فيه ايه انا فين شويه و اقول يمكن مش ميت اكيد بس شويه تعب طلعنا بيه بره المسجد ركبناه عربيه و طلعنا بسرعه لاقرب مستشفي شيلناه بسرعه دخلناه الطواري فردناه علي السرير كلنا قاعدين مستنين الدكتور اول ما جه طلب الكل يخرج عاوزين نعرف اكشف طيب لا الكل بره طلعنا بره قاعدين قدام بابا مقفول زي الي مستنين علميه ولادة شويه و الدكتور طلع بص لنا و مقلش غير ادعوا له فقد نزل في اول منازل الاخره مستحيل انا اكيد في حلم ايه الي انا فيه ده مين و ازاي وفين هوا الموت نفسه سهل كده يعني واحد يغمض عينه مش يفتحها مفيش تعب مفيش حته اي حاجه نسمعها الدنيا حوليا بتلف الناس كلها بتعيط مقدرتش اقف طلعت رحت الشقه بسرعه عاوز استخبي عاوز اغمض عيني و اقول اني في حلم دخلت خدت حبه منوم دايما بحتفظ بيه للطوارئ و نمت كتير صحيت علي صحابي عمالين يرنوا علشان الجمعه صاحي مش عارف هوا انا كنت بحلم و لا كنت في حقيقه لسه دماغي مش فايقه ياتري انا اصلا فين هوا احنا كلنا في حلم اصلا و هنفوق منه و لا ايه بالظبط
حاولت افوقخدت شاور سريع نزلت اصلي مع صحابي دخلت الجمعه سمعت الخطبه و انا مش سامع اي حاجه صليت و بحاول اركز في الصلاة وانا لسه بقوم من الركوع بطرف عيني لمحت واحد جسمه مال و بيقع علي الي جنبه لقيت فجاه قلبي وقف كام ثانيه مستحيل حد تاني يفكر يموت الناهرده لو كده يبقي بجد انا مش عايش ليه كام ثانيه مروا عليا الدنيا كلها بقيت مكعبات و الاوان غريبه داخله في بعض مش شايف اي حاجه من الي حوالي وجه علي طول في بالي دي اكيد رساله اكيد رساله اتكررت كتير في دماغي لحد ما بدات اشوف الناس لقيت الشخص الي كان وقع ده وقف تاني وبيكمل صلاة كلمت صلاة و طلعت بره و لحد دلوقتي بقول ليه كده اكيد ربنا قدر كل ده يحصل علشان رساله دي اكيد رساله
علي هامش الكلمات
محدش يقول الكلام مش مترابط و لا يحاول يطلع غلطات مطبعيه و املائيه انا مش براجع البوست
:)
تحياتي

الراحلون - افكار ما بعد الرحيل

2007-02-02T02:44:00.000+03:00

هحكي موقف صغير عدي عليا حبيت افكر فيه
الناهرده في اتنين من الي معايا في الشغل قرروا انهم يسيبوا الشغل لمكان تاني عادي كتير عدي الموقف ده طبعا كان لازم نعملهم حفلة انتهاء الخدمات و التورته بقي و العصاير والكلمات الكبيره و المديرين بقي وخلصنا خلاص مشيوا
ابعد ما مشيوا ببص علي المكان الي كانوا قاعدين فيه خلاص فضي وغيرهم هيجي بس التعود انك تشوف كل يوم واحد معين و يختفي فجأه صعب انك بتفكر ياتري امتي تاني هنتقابل
هي دي سنه الحياة والموت اتخلقنا ناخد مكان لحد ما دورنا ينتهي يجي غيرنا يكمل في نفس المكان
الرحيل من مكان عباره عن بروفه صغيره للرحيل الاكبر الي الكل مستنيه بس ساعتها مش بمزاجه هيرحل ده الفرق الوحيد
تحياتي

ريم بنا صوت حالم من اعماق الحياة

2007-01-28T21:50:00.000+03:00

هل سمعت قبل الان صوت ينبعث من اعماق الحياة
هل سمعت ريما بنا ؟
صوت غير الاصوات و معاني تستحق ان تسمعها
انها الفنانه المدافعه عن بلدها دائما ريم بنا
شاهدها و هي تدافع عن فلسطين بفنها
شاهدها و هي تغني بكلمات تنبع من الاعماق

او رابط مباشر
http://www.youtube.com/watch?v=7HFd7s887V8

اما كليب لم تكن تلك حكايتي فهو شيئ جديد في زمن الكليبات المبتذله

او رابط مباشر
http://www.youtube.com/watch?v=29H17jzWhec

ويمكنك ان تسمع الكثير من اغانيها من موقعها مباشر
http://www.rimbanna.com/
ويمكن سماع جميع اغانيها الجديده من
http://www.horria.org/songs.htm
اما في راي اجمل ما ستمع فيه صوتها هوا
اغاني الحلم وياليل ما اطولك ومريا الروح
هل سمعتها قبل الان لا اعتقد فهي غير مشهوره في بلادنا التي لا تبحث عن الا كل قبيح
تحياتي

قاعدة 10-90 اولي الخطوات نحو التعامل مع الذات

2007-01-27T23:51:00.000+03:00

وانا ابحث عني لا بد ان افتش عن ذاتي عن النفس البشريه التي يجب ان ندرك كينونتها لتكون اولي خطواتنا نحو ادراك الذات و من هنا جاء مبدا 10-90 كأولي هذه الخطوات في هذا العالم
The90-10Principle
القاعده بصفه عامه معروفه و هذه الترجمه مقتبسه من منتديات مطلع الشمس
اكتشف قاعدة 10/90, ستغير لك حياتك(على الأقل ردود أفعالك تجاه مواقف معينة)
قرأت مقال لستيفن كوفي ، ود. ستيفن آر كوفي هو أحد مؤسسي شركة فرانكلين كوفي وقد ألف مجموعة من أشهر الكتب وأكثرها مبيعاً في العالم تناقش التحديات والتعقيدات التي يواجهها المرء في عالمنا اليوم على الصعيدين الشخصي والمهني مثل كتاب "العادات السبع للأشخاص الأكثر فعالية" ، وكتاب "الأهم ثم المهم".. فأحببت أن تشاركوني قرأة هذا المقال والاستفادة منه على الصعيدين الشخصي والمهني .
ما هي هذه القاعدة ؟ 10% من الحياة تتشكل من خلال ما يحدث لنا ، و الـ90 % من الحياة يتم تحديدها من خلال ردود أفعالنا !!!!!ماذا يعني هذا؟ معنى هذا الكلام أننا في الواقع ليس لدينا القدرة على السيطرة على الـ 10% مما يحدث لنا , فنحن لا نستطيع منع السيارة من أن تتعطل أو الطائرة من الوصول متأخرة عن موعدها (مما سيؤدي ذلك إلى إفساد برنامجنا بالكامل) ، أو سائق ما قطع علينا حركة المرور أو السير . فنحن في الواقع ليس لدينا القدرة على التحكم بـ10% ولكن الوضع مختلف مع الـ90 % ، فنحن من يقرر كيف يمكن أن تكون الـ90 % كيف ذلك ؟؟عن طريق ردود أفعالنا ... نحن لا نستطيع التحكم في إشارة المرور الحمراء ، و لكن نستطيع السيطرة على ردة فعلنا ، لا تدع الآخرون يجعلونك تتصرف بحماقة، أنت تستطيع أن تقرر ماهي ردة فعلك المناسبةدعونا نستخدم هذا المثالكنت تتناول طعام الإفطار مع عائلتك و فجأة أسقطت ابنتك الصغيرة فنجان القهوة على قميص عملك. لم يكن لك دور فيما حدث هنا ولكن ماسوف يحدث لاحقا سيتقرر حسب ردة فعلك ...بدأت بالصراخ و الشتم و قمت بتوبيخ ابنتك.. فأخذت الطفلة في البكاء ، ثم استدرت إلى زوجتك موبخا إياها لوضعها الفنجان على حافة الطاولة ، وبعد مشادة لفظيه قصيرة بينكما، اندفعت إلى الطابق العلوي و قمت بتغيير قميصك و من ثم عدت إلى الطابق السفلي ، فوجد أن ابنتك قد انشغلت بالبكاء عن إنهاء فطورها و الاستعداد للمدرسة ، و نتيجة لذلك فاتها باص المدرسة و زوجتك كان لابد أن تغادر لعملها .. اضطررت إلى إيصال ابنتك بسيارتك الخاصة إلى المدرسة ، و بما أنك متأخر قدت سيارتك بسرعة 40 ميل في الساعة من أصل 30 ميل في الساعة كحد أقصى.. و بعد 15 دقيقة تأخير و دفع مخالفة مرورية بقيمة 60$ ، وصلت إلى المدرسة .. ركضت ابنتك إلى مبنى المدرسة دون أن تقول لك مع السلامة .. و بعد و صولك إلى المكتب متأخراً 20 دقيقة ، وجدت أنك قد نسيت حقيبتك ....فها هو يومك بدأ بصورة سيئة و استمر من سيء إلى أسوء .. بعد عودتك إلى المنزل تجد توترا في العلاقة بينك وبين زوجتك وابنتك. لماذا ؟؟ بسبب ردود أفعالك منذ الصباح ...لماذا كان يومك سيئا ؟؟ أ)هل هو بسبب القهوة ؟؟ب)هل هو بسبب إبنتك ؟؟ ج )هل هو رجل الشرطة؟ د )هل أنت سببت لنفسك ذلك؟ الإجابة هي: دلم يكن لك دخل أو سيطرة على حادثة الفنجان ولكن ردة فعلك في الخمس ثواني التالية هي من تسببت في إفساد يومكهنا هو ماكان ممكن وينبغي أن يحدث .. فنجان القهوة وقع عليك ، و بدأت ابنتك بالبكاء .. وقلت لها بكل لطف: لا بأس يا عزيزتي .. و لكن كوني في المرة القادمة أكثر حذراً و انتباه .. تتناول المنشفة وتسرع إلى الطابق العلوي .. تستبدل قميصك وتتناول حقيبة أوراقك وثم تعود إلى الطابق السفلي في الوقت المحدد لترى ابنتك من النافذة و هي تصعد إلى حافلة المدرسة ملوحة بيدها لوداعك تصل إلى عملك مبكراً بـ 5 دقائق و تحيي زملائك بكل مرح و ابتهاج .. ويبدي رئيسك تعليقا حول يومك الرائع.لاحظت الفرق؟ يوجد سيناريوهان مختلفان .. لهما نفس البداية ،ولكن نهاية مختلفة لماذا ؟؟ بسبب ردة فعلك .. و في الحقيقة لم يكن لديك أي سيطرة على الـ 10% التي حدثت أما الـ 90% الأخرى فتم تحديدها عن طريق ردة فعلكهنا بعض الطرق لتطبيق القاعدة إذا قال أحد الأشخاص : بعض الأشياء السيئة عنك ، فلا تكن مثل الأسفنج .. بل دع الهجوم يسيل عليك مثل الماء على الزجاج .. و لا تسمح للتعليقات السلبية أن تؤثر عليك !فردة الفعل الإيجابية لن تفسد يومك ، بينما ردة الفعل السلبية قد تؤدي إلى فقدانك للأصدقاء أو فصلك من العمل و تكون في حالة من العصبية و الإرهاق ..... إلخ .. كيف تكون ردة فعلك إذا قطع عليك أحد الأشخاص حركة السير ؟؟ هل تفقد أعصابك ؟؟ هل تضرب مقود السيارة بقوة حانقا. أحد أصدقائي أسقط مقود السيارة! هل تشتم؟؟ هل يرتفع ضغط دمك عاليا ؟؟ من سيهتم إذا وصلت إلى العمل متأخراً بعشر ثواني ؟؟ لماذا تسمح للسيارات بإفساد قيادتك تذكر قاعدة الـ 10/90 و لا تقلق لما سيحدث لكَ بعد ذلك قيل لك بأنك فقدت وظيفتكَ ... لماذا الغضب و الانزعاج و الأرق ؟؟؟ استغل طاقة القلق ووقتك في إيجاد وظيفة أخرى تأخر إقلاع الطائرة ، وأفسد ذلك برنامجكَ اليومي .. لماذا تصب جام غضبكَ و إحباطكَ على مضيفة الطائرة ؟؟ هي ليس لديها القدرة على التحكم في موعد وصول الطائرة. استغل وقتكَ في الدراسة أو التعرف على مسافر آخر ... التوتر لن ينتج عنه إلا تعقيد أوضاعك وجعلها إلى الأسوء. طبق قاعدة 10/90 وستدهشك النتائج , لن تخسر شيئا إن حاولت ...10/90 قاعدة مذهلة والقليل من الناس من يعرفها ويطبقها في حياتهوالنتيجة ؟ الملايين من الناس تعاني من إرهاق وإجهاد لا مبرر له ومحاكم ومشاكل في القلب...... إذن علينا جميعاً أن نفهم ونطبق هذه القاعدة... حياتك عندها ستتغير!! وأنا ايضاً أتمنى لكم ذلك

لماذا الان ؟

2007-01-27T11:28:00.000+03:00

السؤال الذي اتسائله الان لماذا الان لماذا قررت بدأ مدونتي الان ليس قبل الان وليس بعد زمن منذ زمن بعيد اتابع التدوينات العربيه اتابع الكثير من الاسماءاطالع الالوان المختلفه من المدونات ما بين صحفيه و شخصيه و اجتماعيه الكثير قرأت و الكثير تفاعلت ولكن لم اكتب ابدا هل حان الوقت لا ادري لماذا ولكن يبدوا ان هناك جزء مني يريد الخروج يريد ان يري النورسأطلق لروحي العنان لاري الي اي مدي سأكون لتكون مدونتي مجرد ذكريات ممله عن افكاري لاراها حين تضيع الذكريات